ASUS kompaniýasy täze Vivobook 18 noutbugyny hödürledi. Ol 18,4 dýuýmlyk ekran we güýçli AMD Ryzen 7 8845HS prosessory bilen enjamlaşdyrylandyr.
Vivobook 18 AMD Ryzen 7 8845HS prosessory bilen işleýär – ol 5,1 GGs çenli takt ýygylygy bolan 8 ýadroly prosessordyr. Zen 4 arhitekturasyna esaslanýan prosessor, Radeon 780M integrirlenen grafikasy bilen enjamlaşdyrylan. Bu grafiki prosessor enjamyň iş hem-de multimediýa üçin ýokary öndürijilikli bolmagyny üpjün edýär.
Esasy wersiýa 16 GB operatiw ýady (RAM) öz içine alýar, ony 32 GB-a çenli giňeltmek mümkin. Içerki ýady 512 GB-lyk SSD PCIe 4.0 bolup, 1 TB SSD wersiýasy hem bar.
Bu noutbugyň esasy aýratynlygy – 18,4 dýuýmlyk 16:10 gatnaşygy bolan ekranydyr. IPS matrisasy 1920×1200 piksel durulygy, 144 Gs täzeleniş ýygylygyny we 300 nit ýagtylygy goldaýar. Şonuň üçin bu noutbuk grafikalar bilen işlemek, wideo redaktirlemek we mazmun görmek üçin örän amatlydyr.
Enjamyň ekrany «TÜV Rheinland» tarapyndan sertifikatlaşdyrylan, ýagny ol gözüň göreji üçin zyýanly bolan gök şöhläniň zyýanly täsirlerini peseldýär.
Ölçeglerine garamazdan, noutbuk örän ykjam – onuň korpusynyň galyňlygy 1,86 sm, agramy bolsa 2,6 kg. Dizaýny «Quiet Blue» (goýy gök) reňkde ýerine ýetirilen, şeýle-de ulanyjylar üçin amatly bolan ErgoSense klawiatura bilen enjamlaşdyrylan.
Vivobook 18 iki USB-C 3.2, iki USB-A 3.2, HDMI porty we 3,5 mm ses çykyşy bilen üpjün edilendir. DisplayPort Alt Mode we Power Delivery goldawy bar, bular daşarky monitorlary birikdirmäge we olara USB-C arkaly zarýad bermäge mümkinçilik berýär.
Batareýa tiz zarýad alşy goldaýar – 49 minutda 60% zarýad bilen üpjün edýär, bu bolsa noutbugy ýolda ulanmak üçin amatly edýär.
Täze Vivobook 18 noutbugyň bahasy 899 ýewrodan başlaýar.
