Amerikaly rep ýerine ýetirijisi Doechii (hakyky ady – Jeýla Jaýmiýa Hikmon) Billboard neşiri tarapyndan ýylyň zenany diýlip ykrar edildi. Bu barada neşiriň saýtynda habar berilýär.
Doechii ilki “Parlak ýyldyz” baýragyna mynasyp bolup, soňra ýylyň zenany diýlip ykrar edilen üçünji artist boldy. Mundan öň şeýle üstünligi Ledi Gaga we Ariana Grande gazandy.
Baýrak aýdymça 29-njy martda Kaliforniýada geçiriljek dabarada gowşurylar. Ol bu tituly alan ikinji rep ýerine ýetirijisi bolar. Birinjisi 2020-nji ýylda Cardi B bolupdy.
“2023-nji ýylda “Parlak ýyldyz” baýragyny alandan soň, Doechii batyrgaý döredijiligi we ajaýyp zehini bilen aýdym-saz pudagynda çalt tanaldy. Žanrlary garyşdyrmak bilen, Doechii aýdym-saz pudagynda öňdebaryjy bolmagyň nämäni aňladýandygyny kesgitleýär” – diýip, Billboard-yň redaksion müdiri Hanna Karp belledi.
Ozal Billboard tarapyndan ýylyň zenanlary Teýlor Swift, Oliwiýa Rodrigo, Billi Aýliş, Selena Gomes we Madonna boldy. Doechii ýylyň iň gowy rep albomy üçin “Gremmi” baýragynyň hem eýesidir.
