Meşhur pop-rok topary Imagine Dragons-yň “Children of the Sky” aýdymy indi Aýyň üstünde ýatyr. Bu aýdym Bethesda studiýasynyň Starfield kosmiki oýny üçin kompozitor Inon Zur bilen bilelikde döredilipdi.
Aýdym Ýeriň tebigy hemrasyna Intuitive Machines hususy amerikan kompaniýasynyň Athena gonuş modulynyň bortunda iberildi, ýöne kompaniýa üçin eýýäm ikinji Aý missiýasy şowsuz tamamlandy. 7-nji martda modul kraterde meýilleşdirilmedik nokada gondy we gapdal ýykyldy. Gün batareýalary zarýad almak mümkinçiligini ýitirdi we sowuk temperatura akkumulýatorlary hatardan çykardy. Meýilnama görä, enjam Aýda on gün işlemelidi, ýöne missiýa möhletinden ir togtady.
“Children of the Sky” aýdymy modulyň bortundady. Aýdym Aý üçin maglumat merkezine Lonestar Data Holdings kompaniýasy tarapyndna ýüklendi. Ilkibaşda ol Aýdan Ýere, 400 müň km aralykdan ýaýlym bilen görkeziljek ilkinji aýdym bolar diýlip meýilleşdirilipdi. Ýöne modulyň energiýasynyň ýokdugy sebäpli bu pikiri iş ýüzüne geçirmek başartmady.
Şeýle-de bolsa, “Children of the Sky” Aýda saklanýan medeni obýektleriň özboluşly kolleksiýasynyň üstüni ýetirdi. Inon Zuryň aýtmagyna görä, bu eýýäm “ajaýyp üstünlik” hasaplanýar.
Belläp geçsek, 2024-nji ýylda Intuitive Machines kompaniýasynyň Odisseus Aý moduly Ýeriň hemrasyna Jimmi Hendriksiň, Bob Marliniň, Elwis Presliniň, Jenis Jopliniň, The Who-nyň we beýleki köp sanly sazandalaryň aýdymlarynyň sanly ýazgylaryny eltdi.
