ABŞ-nyň prezidenti Donald Trampyň ýurduň ykdysadyýetinde bolup biljek «geçiş döwri» hakyndaky beýannamasy ABŞ-nyň gazna biržasynda güýçli pese gaçyşa sebäp boldy diýip, «Bloomberg» we «Reuters» neşirleri habar berýär.
Tramp 9-njy martda Fox News-e beren interwýusynda, 2025-nji ýylda ABŞ-nyň ykdysadyýetiniň resessiýa düşmek ähtimallygy baradaky soraga gönümel jogap bermän, diňe täze administrasiýanyň edýän hereketleriniň «örän giň gerimlidigini» belledi.
Bu sözlerden soň, 10-njy martdaky söwdalaryň netijesinde Nasdaq 100 görkezijisi 3,8% aşak gaçdy. Oňa girýän kompaniýalaryň umumy bazar bahasy bir trillion dollardan hem gowrak pese düşdi. Iň köp ýitgi çeken kompaniýalaryň biri Tesla bolup, onuň paýnamalary bir günde 15,4% arzanlady. Nvidia-nyň bahasy 5,1% pese gaçdy. Beýleki iri kompaniýalar (Alphabet, Amazon, Apple, Meta, Microsoft) hem şoňa golaý ýa-da ondaan birneme azrak ýitgiler çekdi.
The Bell-iň analitikleri söwdagärleriň aladalarynyň Trampyň Kanadadan we Meksikadan getirilýän harytlara salgyt girizmek, şeýle-de Hytaý üçin salgytlary ýokarlandyrmak baradaky karary bilen baglanyşyklydygyny belleýärler. Peterson bütindünýä ykdysadyýet institutynyň çaklamalaryna görä, Trampyň import salgytlary her bir amerikalynyň ýyllyk çykdajysyny ortaça 1200 dollar artdyrar. Ýel uniwersitetiniň çaklamasyna görä bolsa, bu görkezijiniň 1600-2000 dollar aralygynda bolmagy mümkin.
Bu çaklamalara ABŞ-nyň söwda ministri Goward Lýutnik garşy çykýar. Ol resessiýanyň boljakdygyny ret edip, ABŞ-da daşary ýurt harytlarynyň gymmatlajakdygyny, emma içerki önümleriň bolsa arzanlajakdygyny aýdýar.
