Kanadanyň Merkezi bankynyň öňki başlygy Mark Karni häkimiýet başyndaky Liberal partiýanyň liderligine saýlandy. Ol ýakyn wagtda premýer-ministr wezipesine girişer we bu wezipedäki Jastin Trýudonyň ornuna geçer. Bu barada «Associated Press» habar berýär.
Häzirki premýer-ministr Jastin Trýudonyň toparyndan bolmadyk ýeke-täk dalaşgär bolan Karni, partiýanyň 150 müň agzasynyň arasynda geçirilen ses berişlikde 85,9% ses gazandy.
2015-nji ýyldan bäri premýer-ministr wezipesinde işläp gelýän Trýudo ýanwar aýynda wezipeden çekiljekdigini yglan edipdi. Trýudo Kanadanyň general-gubernatora resmi arza bilen ýüz tutandan soň, Karni wezipesine resmi taýdan girişer.
Karni 2008-2013-nji ýyllarda Kanadanyň Merkezi bankyna ýolbaşçylyk etdi, soňra 2020-nji ýyla çenli Angliýanyň bankynyň başlygy boldy. Ondan soň bolsa, Trýudonyň ykdysady meseleler boýunça geňeşçisi bolup işledi. Saýlawdan öňki çykyşlarynda Karni ilatyň orta gatlagy üçin salgytlary peseltmegi, goranyş üçin çykdajylary JIÖ-niň 2%-ine we ondan hem ýokary derejä ýetirmegi, şeýle-de ABŞ-dan getirilýän harytlara «dollara-dollar» ýörelgesi boýunça gümrük paçlaryny girizmegi wada berdi.
