2025-nji ýylyň 22-nji martynda Kýolndaky Breker auksionyna dünýäde ilkinji şar şekilli Malling Hansen Writing Ball ýazuw maşynkasynyň modeli çykarylar. Kolleksionerleriň bu özboluşly artefakt üçin ýiti göreş alyp barmagyna garaşylýar diýip, New Atlas ýazýar.
Bu maşynka 1867-nji ýylda daniýaly Rasmus Hansen tarapyndan döredildi. 35 sany saklanyp galan nusgadan diňe bäşisi şahsy elde saklanýar, bu hem auksiony aýratyn gyzykly edýär.
Ilkinji köpçülikleýin çykarylan özboluşly dizaýnly bu “ýazuw şary” elde ýazanyňdan has çalt çap etmäge mümkinçilik berýär: polat harplar syýa lentasy arkaly kagyza urulýar, kagyzly platforma bolsa awtomatik hereket edýär. Öz döwri üçin bu öňegidişlikli oýlap tapyşdy.
Bu maşyna beýik nemes filosofy Fridrih Nisşe hem aýratyn gyzyklanma bildirip, ondan işjeň peýdalanypdyr, bu hem onuň taryhy gymmatlygyny has artdyrýar. Häzirki günde bu dünýäniň iň seýrek we iň gymmat maşynkalarynyň biridir.
Apple-1-iň we Enigma maşynlarynyň satuwy bilen belli bolan Breker auksion öýi 2021-nji ýylda şeýle “şary” 170 000 ýewro satypdy – bu amerikaly ýazyjy Kormak Makkartä degişli bolan Lettera 32 Olivetti-den soň (rekord – 254 500 dollar) ikinji netijedir.
