Goldin auksion öýi «Flamin' Hot Cheeto» atly mekgejöwen çipsini 87 müň 840 dollara satdy diýip, «Associated Press» habar berýär. Çipsiň beýle gymmat bahadan satylmagynyň sebäbi – onuň meşhur animasion serialynyň gahrymany pokemon Çarizardyň şekilinde bolmagydyr.
Bu çips auksionda uly gyzyklanma döretdi – oňa 60 sany teklip berildi.
Uzynlygy 7,62 sm bolan çips, pokemon barada maglumat berýän karta berkidilip, açyk plastik gapda ýerleşdirildi. Ony «1st & Goal Collectibles» atly sport sowgatlyklary bilen meşgullanýan kompaniýa 2018-2022-nji ýyllaryň aralygynda tapyp, saklan eken.
Bu çips sosial torlarda geçen ýylyň ahyrynda uly meşhurlyk gazandy.
Pokemonlar – super ukyplary bolan gahrymanlardyr. 1997-2023-nji ýyllar aralygynda ýaýlyma berlen meşhur «Pokemon» anime-serialynyň baş gahrymanlary Eş Ketçum atly oglanjyk we onuň dosty pokemon Pikaçu bolupdy.
Pokemon franşizasy bilen baglanyşykly zatlar öňem auksionda örän ýokary bahalardan satylypdy. Mysal üçin, 2020-nji ýylda seýrek «Pikachu Illustrator» karty 250 müň dollara satylypdy. Bu karty pokemon gahrymanlarynyň dizaýneri Atsuko Nişida döredipdi. Olardan bary-ýogy 39 sanysy bardy we diňe 10 sanysy saklanyp galypdy. Bu kartlar 1998-nji ýylda «CoroCoro Comic» illustrasiýa bäsleşiginiň ýeňijilerine sylag hökmünde berlipdi.
