Intuitive Machines kompaniýasynyň Athena kosmos enjamy Aýa gondy, ýöne onuň gonuşy barada jikme-jik maglumatlar heniz ýok. Gonuş 6-njy martda Aşgabat wagty bilen 22:31-de, hemranyň günorta polýusyndan, takmynan, 160 km uzaklykda, Mons Muton belentliginde bolup geçdi. Bu barada CBS News habar berýär.
62,5 mln dollarlyk IM-2 missiýasy 26-njy fewralda SpaceX Falcon 9 raketasynda ýola düşdi. Uçuşdan dört ýarym günden soň modul Aýa golaý orbita çykdy we aşak düşmäge başlady. 22:35-de kompaniýa modulyň hereketlendirijisiniň işlemegini bes edendigini habar berdi, ýöne onuň asuda gonandygy barada heniz resmi tassyklama ýok.
Enjam bilen aragatnaşyk saklanýar, onuň Gün batareýalary işleýär, bort kompýuteri bolsa buýrugy kabul edýär. Ýöne inersial ölçeg blogy (IMU) Athena-nyň, ähtimal, gapdal ýatandygyny görkezýär.
Uçuşlary dolandyryş merkezinde gonuş ýerinden suratlara garaşylýar.
Ýatlap geçsek, bir ýyl mundan ozal hem Intuitive Machines şeýle ýagdaýa düşüpdi. Kompaniýanyň ilkinji gonuş moduly Odysseus hem Aýa ýetdi, ýöne gonuş wagty ýykyldy. Kompaniýanyň resmi wekilleri heniz Athena bilen bagly ýagdaýa teswir bermedi. Metbugat maslahatynyň bolmagyna garaşylýar, ýöne onuň takyk wagty aýdylmady.
