Bostonyň seýrek golýazmalary we taryhy artefaktlary satmaklyga ýöriteleşen RR auksion öýi Albert Eýnşteýniň dilini çykaryp duran, goly çekilen suratyny 338 630 dollara satdy. RR-iň web sahypasynda aýdylyşyna görä, bu meşhur fotosuratyň dokuz sany gol çekilen görnüşiniň biridir.
Surat 1951-nji ýylyň 14-nji martynda United Press International-yň suratçysy Artur Sass tarapyndan Eýnşteýniň 72 ýaşynyň dolan güni düşürilipdir.
“Prinston klubunda geçirilen dabaraly agşamdan soň, Eýnşteýn öýüne gaýtmak üçin dostunyň ulagyna tarap barýarka onuň daşyny köp sanly suratçylar we habarçylar gurşap alýar. Sassa oňa golaý barmak başardypdyr we ünsüni çekmek üçin: "Heý, professor, doglan günüňizde surata düşürer ýaly, ýylgyraýyň-da, hä?" diýip, gygyrypdyr. Şol pursat tutuş günläp kameralara ýylgyrmakdan bizar bolan Eýnşteýn dessine bärsine öwrülip, dilini çykarypdyr. Bagtyna, Sass pursady elden bermän, kameranyň düwmesine basyp ýetişipdir" - diýip, suratyň nähili peýda bolandygy barada auksion öýüniň web sahypasynda aýdylýar.
Gazetde suratyny gören fizik ony degişme bilen kabul edipdir we hatda ondan dokuz sanysyny çykarmagy sargyt edipdir. Olara gol çekip, dostlaryna paýlapdyr. Olaryň biri Germaniýadan ABŞ-a göçüp baran we Prinston uniwersitetinde fizik bilen bile işlän ykdysatçy Otto Natana berlipdir.
Suratda Eýnşteýn: “Bu yşarat diňe galan dünýä degişlidir. Siziň A. Eýnşteýniňiz 51".
955-nji ýylda alym ýogalandan soň, Natan suraty heýkeltaraş Margaret Sanderse beripdir. Soňra surat, auksiona çykarylýança, maşgalada saklanypdyr.
Mundan on ýyl gowrak ozal gol çekilen suratyň başga bir nusgasy 122,500 dollara satylypdy.
Şeýle-de bolsa, bu pul möçberini 2024-nji ýylda Christie's auksionynda Eýnşteýniň ABŞ-nyň prezidenti Franklin Ruzwelte Germaniýada ýadro ýaragyny döretmegiň howpludygy barada ýazan haty üçin tölenen 3,9 million dollar bilen deňeşdirip bolmaýar.
