Kaliningradda 50 mln ýyllyk ýantardan taýýarlanan köýnek hödürlendi. 2 kg agramly önüm Kaliningradyň ýantar kombinatynyň Ýantar moda öýüniň ussatlary tarapyndan taýýarlandy diýip, RBK habar berýär.
Köýnek gadymy flora we fauna böleklerini – agaç gabygynyň, gülleriň, topragyň bölejiklerini we beýleki mineral hem organiki bölekleri saklaýan 1260 sany dury ýantar plastinalaryndan ybarat. Bu elementler matanyň özboluşly nagşyny emele getirdi.
Birsydyrgyn reňk geçişini döretmek üçin ýantar ýörite peçlerde taplandy.
Önümi taýýarlamak üçin üç aý sarp edildi. Ilkibaşda zergärler ululygy 40x15 mm we galyňlygy 1 mm bolan plastinalary taýýarlady. Soňra tikinçiler olary inçejik sapagyň we ýörite egri iňňäniň kömegi bilen fatin esasyna berkitdi.
“Biziň ýantar köýnegimizde podiuma çykmak, gyzyl ýodalarda görünmek ýa-da dabaraly çärelerde ýaldyramak bolýar. Baltika ýantaryna bütin dünýäde uly isleg bildirilýär, şonuň üçin biz dizaýner eşiklerinde ýantaryň mümkinçiliklerini görkezip, onuň gymmatyny bilýänleri haýran galdyrmagy dowam etdireris” – diýip, kombinatyň zergär önümçiligi we täjirçilik işi boýunça baş müdiriniň orunbasary Maýýa Skworsowa belledi.
Şeýle-de, ýantar moda öýi 60 sany tejribe önümini hödürledi: bluzkalar, ýubkalar, penjekler we hatda ýantar nagyşly we mozaikaly jinsi. Kolleksiýa ýantar torba ýaly özboluşly aksessuarlary hem öz içine aldy.
