Xiaomi kompaniýasy Xiaomi 15 we Xiaomi 15 Ultra flagman modelleriniň global görnüşlerini hödürledi. Smartfonlar güýçli kameralar we prosessorlar bilen enjamlaşdyrylan bolsa-da, batareýalarynyň sygymy peseldildi, şeýle-de Hytaýdaky nusgalaryna garanyňda iki esse gymmat bahadan satylýar.
Xiaomi 15 Ultra: 6,73 dýuýmlyk AMOLED displeý (3200×1440, 1-120 Gs, 3200 kd/m²), Snapdragon 8 Elite prosessory, 16 GB RAM (operatiw ýat) we 1 TB-a çenli içerki ýat bilen üpjün edilen. Esasy kamerasy 50 MP Sony LYT-900 (f/1.63) sensory we 200 MP Samsung HP9 (f/2.6, 4,3 esse ýakynlaşdyrma) periskop kamerasy bilen enjamlaşdyrylan. Batareýasynyň sygymy 6000 mA·sag-dan 5410 mA·sag-a çenli peseldılen. Enjam gara, ak we gara-çal reňklerde hödürlenýär, çal-ýaşyl reňk bolsa diňe Hytaý bazarynda galýar. Bahasy: 1499 ýewro (512 GB) we 1699 ýewro (1 TB).
Xiaomi 15: 6,36 dýuýmlyk LTPO OLED displeý (2670×1200, 1-120 Gs, 3200 kd/m²), Snapdragon 8 Elite prosessory, 12 GB RAM we 512 GB-a çenli içerki ýat bilen üpjün edilen. Leica kamerasy: 50 MP Light Fusion 900 (f/1.62) sensoryndan, giň burçly moduldan we teleobýektiwden (5 esse optiki ýakynlaşdyrma mümkinçiligi bilen) ybarat. Batareýasynyň sygymy 5400 mA·sag-dan 5240 mA·sag-a çenli peseldilen. Bahasy: 999 ýewro (256 GB) we 1099 ýewro (512 GB).
Iki enjam hem Android 15 esasly HyperOS 2.0 interfeýsinde işleýär we 90 Wt çalt zarýad alşy goldaýar.
Belläp geçsek, Hytaýda esasy Xiaomi 15 modeliniň bahasy, takmynan, 500 ýewro barabardyr.
