Ýeňil agramda UFC-niň öňki wagtlaýyn çempiony Toni Fergýuson täze söweşe taýýarlanýar. Global Fight League-iň (GFL) metbugat gullugynyň habar bermegine görä, onuň indiki garşydaşy amerikaly söweşiji we Konor Makgregoryň ýakyn dosty Dillon Denis bolar.
Söweşi 74,8 kg çenli agram derejesinde geçirmek meýilleşdirilýär, ýöne onuň geçiriljek senesi we ýeri heniz yglan edilmedi.
40 ýaşly Fergýuson karýerasynda kyn tapgyry başdan geçirýär – ol soňky sekiz söweşinde yzygider ýeňildi – bu UFC üçin rekorddyr. Ol eýýäm alty ýyl bäri ýeňiş gazanman gelýär. Maýkl Kýeza bilen soňky söweşinden soň, türgen bir elligini oktagonda goýup, karýerasyny tamamlaýandygyna yşarat edipdi, emma tiz wagtdan bu pikirinden ýüz öwürdi. Ýöne ol indi karýerasyny täze GFL ligasynda dowam etdirer. KHBS-iň maglumatlaryna görä, bu ýerde oňa söweş üçin tas 2 mln dollar teklip edildi.
Dillon Denis barada aýdylanda, ol 2019-njy ýylyň iýun aýyndan bäri MMA düzgünleri boýunça ringe çykmady. Şol wagt ol birinji raundda demikdiriji usul bilen Maks Hamfriden üstün çykypdy. Indi bolsa Denis oktagonyň weterany bilen duşuşar.
