Porsche kompaniýasy Macan-yň diňe elektrikli hereketlendiriji bilen hödürlenjek täze neslini resmi taýdan tanyşdyrdy. Onuň önümçiligine 2024-nji ýylyň maý aýynda Leýpsigdäki (Germaniýa) zawodda başlandy. Täze Macan, Audi bilen bilelikde işlenip düzülen Premium Platform Electric (PPE) platformasynyň binýadynda gurulýar.
Salony üç sany ekran bilen enjamlaşdyrylan: 12,6 dýuýmlyk gyralary egrilen gurallar paneli, 10,9 dýuýmlyk merkezi ekran we öňdäki ýolagçy üçin goşmaça 10,9 dýuýmlyk displeý. Täze Macan dört wersiýada hödürlenýär: «Macan Electric», «Macan 4 Electric», «Macan 4S Electric» we «Macan Turbo Electric».
Iň kuwwatly wersiýa bolan «Macan Turbo Electric» iki sany elektrikli hereketlendiriji bilen enjamlaşdyrylan. Olar umumylykda 639 at güýjüni öndürýär we 1130 Nm burulma momentini (torky) üpjün edýär. Bu model 100 km/sag tizlige bary-ýogy 3,3 sekuntda ýetýär. WLTP ölçegine görä, bir gezeklik zarýad bilen 612 km ýol geçýär. 100 kWt-sagatlyk akkumulýatory 270 kWt-a çenli tiz zarýad alşy goldaýar we 10%-den 80%-e bary-ýogy 21 minutda ýetýär.
Täze Macan sport dinamikasyny krossoweriň amatlylygy bilen utgaşdyrýar. Onuň yzky ýük bölüminiň göwrümi 540 litr, öň tarapyndaky goşmaça bölümiň göwrümi bolsa 84 litr. Porsche bu model arkaly, elektrikli krossower pudagynda ýokary tehnologiýany we ýokary derejeli tizlenmäni özünde jemlemäge dowam edýär.
