Keti Perri kosmos syýahatçysy bolar. Meşhur aýdymçynyň Jeff Bezosyň kosmos gämisi bilen uçjakdygy barada Blue Origin aerokosmiki kompaniýasynyň resmi web sahypasynda habar berildi.
Täze kosmos syýahatçylarynyň topary diňe zenanlardan ybarat bolar. Toparyň düzüminde Keti Perriden başga-da, «CBS Mornings» gepleşiginiň alyp baryjysy Geýl King we Bezosyň maşgalasy Loren Sançes hem bar. NS-31 missiýasynyň ýaz paslynda uçurylmagy meýilleşdirilýär.
«Nädip düşündirjegimi bilemok, hem gorkýan, hem tolgunýan. Bu çaga dogurmazdan ozalky özümi duýşuma meňzeýär» — diýip, 70 ýaşly King öz duýgularyny paýlaşdy.
Bu missiýa Blue Origin kompaniýasynyň «New Shepard» maksatnamasynyň çäklerindäki 11-nji adamly uçuş, kompaniýanyň umumy taryhyndaky 31-nji uçuş bolar. 1963-nji ýylda sowet kosmonawty Walentina Tereşkowa kosmosa ýeke uçanyndan soň, ilkinji gezek diňe zenanlardan ybarat ekipaž kosmosa uçar.
Belläp geçsek, 2023-nji ýylyň maý aýynda Blue Origin NASA bilen şertnama baglaşyp, Aýa astronawtlary alyp gitjek kosmos gämisini işläp taýýarlamaga hukuk gazanypdy.
