Samsung iki sany täze arzan smartfonyny – Galaxy M06 5G we Galaxy M16 5G modellerini tanyşdyrdy. Iki telefon hem 5G aragatnaşygyny goldaýar we arzan bahadan gowy aýratynlyklary bilen tapawutlanýar diýip, GSMArena belleýär.
Aýratynlyklary babatynda Galaxy M16 5G modeli Galaxy A16 5G modeline meňzeýär. Ol 6,7 dýuýmlyk AMOLED displeý (durulygy 2340×1080 piksel), MediaTek Dimensity 6300 prosessory we 5000 mA·sag sygymly batareýa (25Wt tiz zarýad berşi goldaýar) bilen enjamlaşdyrylan.
Telefonyň esasy kamerasy 50 MP bolup, şeýle-de 5 MP giň burçly kamera we 2 MP makro kamera bilen üpjün edilen. Smartfon 4 GB, 6 GB ýa-da 8 GB operatiw ýatly (RAM) we 128 GB ýa-da 256 GB içerki ýatly görnüşlerde hödürlenýär.
Enjam Android 15 OS esasly One UI 7 interfeýsinde işleýär. Smartfon 6 ýyl uly täzelenmeleri alar. Ulanyjylar onuň «Blush Pink» (gülgüne), «Mint Green» (ýaşyl) we «Thunder Black» (gara) reňklerini saýlap bilerler.
Galaxy M16 5G-niň bahasy 130 dollardan başlaýar.
Galaxy M06 5G – bu Galaxy F06 5G modeliniň täze ady bilen çykarylan görnüşidir. Ol 6,7 dýuýmlyk LCD displeý (durulygy 1600×720 piksel), MediaTek Dimensity 6300 prosessory we 50 MP esasy kamera hem-de 2 MP çuňluk sensory bilen enjamlaşdyrylan. Smartfon 4 GB ýa-da 6 GB operatiw ýatly we 128 GB içerki ýatly görnüşlerde hödürlenýär. Bu enjam hem Android 15 OS esasly One UI 7 interfeýsinde işleýär, ýöne bu model diňe 4 ýyl uly täzelenmeleri alar.
Smartfon gara we ýaşyl reňklerde elýeterli bolar.
Galaxy M06 5G-niň bahasy 110 dollardan başlaýar.
