25-nji fewralda Çilide elektrik energiýasynyň köpçülikleýin öçürilmesi bolup geçdi. Bu barada Çiliniň Milli elektrik energiýany utgaşdyryjy edarasy habar berdi.
Resmi maglumatlara görä, toguň öçürilmegi ýerli wagt bilen 15:16-da (Aşgabat wagty bilen 23:16) bolup, Çiliniň demirgazygynda Arikiden başlap, günortada Los-Lagos sebitinde çenli aralygy, ýagny tutuş ýurdy öz içine aldy.
La Tercera gazetiniň maglumatlaryna görä, tok bilen bagly näsazlyklar ýüze çykyp başlandan ýarym sagat geçeninden soň hem, 15:53-de, tutuş ýurt boýunça sebitleriň 80,1%-i çyrasyz otyrdy. Köpçülikleýin tok öçürilmeginiň esasy sebäbi Norte-Çiko sebitindäki iri elektrik stansiýasynda ýüze çykan bökdençlikler agzalýar.
Çiliniň paýtagty Santýagoda metropolitenlerde otlularyň hereketi togtadyldy. Otlularda galan ýolagçylar adatdan daşary ýagdaý zerarly daşary çykarylyp, ýörite awtobuslarda daşaldy. Santýagonyň howa menzili ätiýaçlyk elektrik energiýa ulgamyna geçdi.
Tok öçmesi netijesinde Çiliniň demirgazygynda dag magdan çykaryş işleri togtadyldy. Hususan-da, dünýäde iň iri mis käni bolan Eskondida saklandy diýip, Reuters ýazýar. Mis çykarmak boýunça Codelco döwlet kompaniýasy şahtalarynyň ählisiniň zyýan çekendigini habar berdi.
