Näbelli hakerler topary bitkoini döredijileriň atlaryny bilmegiň başardandygyny nygtaýar. Hakerleriň pikiriçe, Satoşi Nakamoto adynyň aňyrsynda programmistler Brem Koen bilen Len Sassemen gizlenýär diýip, “Argumenty i Fakty” neşiri habar berýär.
Maglumatlar Channel 4 telekanal ulgamynyň döwülmegi bilen alyndy. Hakerler 2008-nji ýylda esasy kriptowalýuta protokolyny döreden we tiz wagtdan köpçüligiň göz öňünden ýiten ulanyjy – Satoşi baradaky film üçin ýygnalan materiallary öwrendi.
Hakerleriň maglumatlaryna görä, ideýanyň başynda duranlar Brem Koen we Len Sassemendir. Koen BitTorrenti-i dörediji hökmünde belli, Sassemen bolsa Internetde gizlinligi üpjün etmek boýunça taslamalaryň, şol sanda Tor brauzerini döretmegiň üstünde işläpdir.
Materialyň awtorlary programmistleriň biri-biri bilen hat ýazyşmasynyň (çak edilýän) ekran suratyny hödürledi. Onda Koen bilen Sassemen kriptowalýuta döredijisini nähili görkezmelidigi barada maslahatlaşyp, oňa ýapon dilinde “akylly” diýmegi aňladýan “Satoşi” adyny bermek pikirine gelýär. Soňra oňa “Nakamoto” familiýasyny goşýarlar.
“Bilýärmiň, gel, ony BitTorCohen ýaly Bittorcoin diýip atlandyraly. Meniň adym we iki taslamamyz şeýleräk eşidilýär. Ýa-da gysgaça – Bitkoin” – diýlip, taslamanyň adyny maslahatlaşýan hatda aýdylýar.
Len Sassemen 2011-nji ýylyň tomsunda 31 ýaşynda aradan çykdy.
49 ýaşly Koen bolsa häzirki wagtda öz döreden Chia kriptowalýutasyny ösdürmegiň üstünde işleýär. Onda Bitcoin-de ulanylýan “Proof of Work” konsensus mehanizminiň deregine “Proof of Space and Times” modeli ulanylýar.
