Aýdymçynyň aýtmagyna görä, aýdym-saz “göwnüň zerur tarlary bilen kaklyşmaly”.
Rianna Harper’s Bazaar neşiri bilen söhbetdeşlikde özüniň dokuzynjy studiýa albomy barada giňişleýin maglumatlar bilen paýlaşdy. Ol reliziň “garaşylmadyk” we “täjirçilik däl” boljakdygyny aýtdy.
Aýdymçy ahyrsoňy dogry ugry tapandygyna ynanýar.
“Görýän welin, albom meniň isleýşim ýaly bolýar, meniň islän göwün tarlarym bilen kaklyşýar” – diýip, Rianna belleýär.
Repçi A$AP Rocky bilen iki ogluny terbiýeleýän aýdymçy studiýadaky işiň enelik bilen döredijiligi utgaşdyrmagyň usulyna öwrülendigini aýdýar. Ol soňky albomyndan bäri geçen ýyllaryň dowamynda aýdymlaryň üstünde işländigini, ýöne uzak wagtlap ugruny kesgitläp bilmändigini belledi.
“Men gözledim. “Ine, şol albom, ýok, başga” diýen sözleri başdan geçirdim. Häzir men hemme zada düşündim! Ýöne hiç kim menden hut şuňa garaşmaýar. Albom täjirçilik ýa-da radioformat bolmaz we meniň döredijiligimiň hut häzir nähili bolmalydygyny görkezer” – diýip, Rianna belledi.
Ol köpçülikleýin habar beriş serişdelerinde albomyň reggi stilinde boljakdygy barada ýaýran maglumatlary ret etdi: “Bu düýbünden beýle däl! Häzir žanr ýok. Şonuň üçin men garaşdym – öňki ideýalar meni görkezmändi”.
“Men aralyk bir zat çykaryp bilmerin. Eger siz sekiz ýyl garaşan bolsaňyz, ýene birneme garaşyp bilersiňiz, bu şoňa deger” – diýip, aýdymçy sözüni jemledi.
Geçen ýylyň iýun aýynda aýdymçy materialdan ýüz öwrüp, ähli işi gaýtadan başlamaly bolandygyny aýdypdy.
Rianna özüniň soňky “Anti” adyny alan albomyny 2016-njy ýylda çykardy.
