Braziliýanyň Buritikupu şäheri süýşgün sebäpli ýumrulmak howpunyň astynda galdy. Häkimiýetler ýerde opurylmalaryň barha ulalýandygy we öýlere ýakynlaşýandygy sebäpli, adatdan daşary ýagdaýy yglan etdi.
Reuters agentliginiň habar bermegine görä, soňky hepdelerde toprakda birnäçe metr uzynlykda jaýryklar emele geldi. Suratlarda käbir jaýlaryň uly oýlaryň göni gyrasynda durandygy görünýär.
“Soňky aýlar oýlaryň möçberi yzygiderli ulalyp, ýaşaýyş jaýlaryna has golaýlaşdy” – diýlip, şäher häkimiýetleriniň resmi beýanynda aýdylýar.
Käbir binalar eýýäm ýumruldy, 1200 töweregi adama bolsa ýaşaýyş jaýyny ýitirmek howpy abanýar. Ilatyň umumy sany 55 000-e ýetýär.
Şeýle ýumrulmalaryň sebäbi güýçli ygallar, tokaýlaryň çapylmagy we gowy meýilnamalaşdyrylmadyk gurluşyk boldy.
Ýerli geograf Marselino Farias boşluklaryň göni öýleriň aşagyndaky toprakda döräp biljekdigini aýdýar. Inžener Lukas Konseýsauwyň bellemegine görä, şäher häkimiýeti bu meseläniň çözgüdini tapmaga taýýar däl.
