22-nji fewralda Counter-Strike 2 oýnunyň serwerlerinde bütin dünýä boýunça näsazlyklar ýüze çykdy.
Müňlerçe oýunçy özleriniň oýundan çykarylýandygyny we täze oýun başlatmakçy bolanda «Serwer bilen baglanyşyk ýok» (Нет соединения с сервером) diýen habary alýandygyny aýtdylar.
DownDetector hyzmatynyň maglumatlaryna görä, ilkinji meseleler Aşgabat wagty bilen sagat 18:45-de ýüze çykyp başlady. Bu näsazlyk Awstriýa, Fransiýa, ABŞ, Kanada, Beýik Britaniýa, Russiýa, Finlýandiýa, Germaniýa we beýleki ýurtlara-da täsir etdi.
Mesele soň çözüldi, emma näsazlygyň sebäbiniň nämedigi belli bolmady. Valve bu ýagdaý barada hiç hili düşündiriş bermedi.
