«Manhart» atly nemes týuning ussahanasy adaty 700 at güýjündäki Porsche 911 GT2 RS-i täzeden işläp taýýarlady. Netijede, ulag indi 966 at güýjüni öndürip bilýär. Bu bolsa ony 2025-nji ýylyň iň çalt sport awtoulaglarynyň birine öwürýär. Ol häzirki giperkarlar bilen hem bäsleşip bilýär diýip, Hypebeast ýazýar.
Kuwwaty artdyrmak üçin inženerler birnäçe üýtgeşmeleri girizdiler. Ulagyň turbokompressory çalşyldy, sowadyş ulgamy kämilleşdirildi we howa giriş ulgamy täzeden işlenip taýýarlandy. Güýçlendirilen ssepleniýe bolsa, PDK karobkasynyň täze ýüklenmelere uýgunlaşmagyna ýardam berdi. Şeýle hem asma ulgamy «Manthey Racing» bilen bilelikde täzeden sazlandy. Týuning işleriniň netijesinde, ulag ýokary tizlikde has durnukly boldy.
Şeýle-de bolsa tormoz ulgamy üýtgedilmedi. Sebäbi Porsche-niň karbon-keramiki tormoz diskleri ýeterlik derejede kuwwatly. Daşky keşbi babatda sport awtoulag karbon (uglerod) elementleri, 22 dýuýmlyk tigirleri we uly spoýleri bilen tapawutlanýar.
Täzeden işlenen Porsche-niň bahasy entek resmi taýdan mälim edilmedi. Emma mümkinçiliklerine görä, onuň bahasynyň ýokary boljakdygy çaklanylýar.
