Epic Games kompaniýasy Fortnite ýaryşynda hile ulanandygy sebäpli, «RepulseGod» lakamy bilen tanalýan professional kibersport oýunçysy Morgan Bamforda garşy kazyýete ýüz tutdy. Kompaniýa onuň ýaryşlara gatnaşmagyny ömürlik gadagan etdi we öň alan baýraklaryny yzyna aldy diýip, «Esports» ýazýar.
«RepulseGod» Fortnite dünýä çempionatynyň 2023-nji ýyldaky finalyna çykmak üçin öz hasabyny başga adamlara bereninden soň uly dawa döräpdi. Hatda ol final tapgyryň başlamazyndan bir gün öň, öz oýunçy ýoldaşy «Jace» bilen bilelikde ýaryşdan çykarylypdy.
Emma Epic Games munuň bilen çäklenmän, Bamforda garşy kazyýete hem ýüz tutdy. Netijede, kompaniýa oňa Fortnite-da ömürlik gadaganlyk girizdi we öň gazanan baýrakdyr pullaryny yzyna alyp, haýyr-sahawat gaznalaryna geçirdi.
Bamford eden işi üçin köpçüligiň öňünde ötünç soramaly boldy.
«Ýaryşlarda hile ulanmak, ýaryşa gatnaşmaga mynasyp bolan oýunçylara zyýan ýetirýär. Men Fortnite jemgyýetçiliginden ötünç soraýaryn. Mundan beýläk, Fortnite-da hiç haçan hile ulanmaryn.» — diýip, ol 15 sekuntlyk wideosynda aýtdy.
Oýunçylar Epic Games-iň bu kararyny goldadylar.
«Eger-de ähli oýun öndürijiler hile ulanýan oýunçylary jogapkärçilige çekip, olary aç-açan ýazgaran bolsady, onda biz bu pudagy alty aýyň dowamynda arassalardyk» — diýip, bloger Rod Breslau aýtdy.
«RepulseGod» 2019-njy ýyldan bäri Fortnite-da professional derejede çykyş edip gelýärdi. Ol iki we üç adamdan ybarat toparlarda geçirilen ýaryşlarda birnäçe gezek ýeňiş gazanypdy. Şeýle-de ol 2020-nji ýylda Okeaniýa sebitinde geçirilen FNCS Invitational ýaryşynda ikinji orny eýeläpdi.
