Vivo täze flagman V50 smartfonyny hödürledi. Täze model diýseň ýuka korpusy, uly batareýasy we ýokary derejeli aýratynlyklary bilen tapawutlanýar.
Smartfon tehniki aýratynlyklary boýunça öňküsinden kän bir tapawutlanmaýar. Şeýle-de bolsa täze modeliň has täsirli we özüne çekiji dizaýny bar: korpusynyň galyňlygy bary-ýogy 7,39 mm, ekranynyň gyralary egrilen görnüşde, kamera moduly iki halkaly dizaýna eýe.
Vivo V50 6,77 dýuýmlyk, 2800×1260 piksel durulykdaky, 120 Gz täzeleniş ýygylykly we aňrybaş 4500 nit ýagtylyk berýän OLED displeý, şeýle hem beýiklikden gaçmalara garşy ýörite Diamond Shield Glass gorag aýnasy bilen enjamlaşdyrylan.
Täze flagman Snapdragon 7 Gen 3 prosessory bilen işleýär. Ol 8 GB/12 GB operatiw ýat (RAM) we 128 GB/512 GB içerki ýat bilen hödürlenýär. Batareýasy 6000 mAh göwrümli bolup, 90 Wt tiz zarýad beriş tehnologiýasyny goldaýar. Smartfon Android 15 esasly Funtouch OS 15 interfeýsinde işleýär.
Esasy kamera moduly iki sany linza bilen enjamlaşdyrylan: optiki stabilizasiýa ulgamyny (OIS) hödürleýän 50 MP çözgütdäki duýgur sensor we 119° görüş burçuny hödürleýän 50 MP giň burçly sensor. Öň tarapdaky kamera bolsa 50 MP sensor bilen üpjün edilen. Ol awtofokus mümkinçiligini goldaýar we 92° burç bilen surata düşürip bilýär. Kameralaryň hersi Ultra-HD 4K formatda wideo ýazga alyp bilýär.
Vivo V50 25-nji fewralda diňe Hindistanda satuwa çykarylar. Täze modeliň beýleki ýurtlarda haçan satylyp başlanjakdygy barada häzirlikçe resmi maglumat ýok.
V50 üç reňkde hödürlenýär: «Gülgüne-gyzyl», «Ýyldyzly gije» we «Titan-çal».
Bahalary:
- Vivo V50 (8/128 GB) — 34999 rupiýa (takmynan, 403 dollar)
- Vivo V50 (12/512 GB) — 40999 rupiýa (takmynan, 472 dollar)
