19-njy fewrala geçilen gije “Milan” bilen “Feýenoordyň” arasynda Çempionlar ligasynyň pleý-offunyň jogap oýny boldy. Toparlar Italiýanyň Milan şäherindäki “San-Siro (Juzeppe Meassa)” stadionynda duşuşdy. Oýun 1:1 hasabynda tamamlandy.
Bu tapgyrda “Milan” bilen “Feýenoordyň” arasyndaky birinji oýun niderlandly toparyň 1:0 hasabynda ýeňiş gazanmagy bilen tamamlanypdy. Şeýlelikde, iki oýnuň jemi boýunça “Feýenoord” (2:1) Çempionlar ligasynyň 1/8 finalyna çykdy.
Bu toparyň soňky 50 ýylda – 1974/1975 möwsüminden bäri ilkinji gezek ÇL-iň/Ýewropa çempionlarynyň kubogynyň 1/8 finalyna çykmagy boldy. Şol wagt ýaryş toparlaýyn tapgyrdan däl-de, 1/16 finaldan başlapdy. 1/8 finalda “Feýenoord” iki duşuşygyň jemi boýunça 0:3 hasap bilen “Barselonadan” utuldy.
Şeýle-de, pleý-offuň jogap oýunlarynyň ilkinji güni “Bawariýa” – “Seltik” (1:1, umumy hasap – 3:2), “Atalanta” – “Brýugge” (1:3, 2:5), “Benfika” – “Monako” (3:3, 4:3) duşuşyklary geçirildi.
Iki oýnuň netijesinde “Feýenoorddan” başga-da, “Bawariýa”, “Brýugge” we “Benfika” ýaryşyň indiki tapgyryna geçdi. Çempionlar ligasynyň 1/8 finalynda “Feýenoord” – “Inter” ýa-da “Arsenal”, “Bawariýa” – “Atletiko” ýa-da “Baýer”, “Brýugge” – “Lill” ýa-da “Aston Willa”, “Benfika” bolsa “Barselona” ýa-da “Liwerpul” bilen oýnap biler.
20-nji fewrala geçilýän gije ÇL-iň jogap oýunlarynyň ikinji güni geçiriler we onuň netijesinde 1/8 finalyň soňky dört gatnaşyjysy belli bolar.
UEFA-nyň Çempionlar ligasynyň 1/8, 1/4 we 1/2 finalynyň bije çekişigi 21-nji fewralda Nýon şäherinde geçer. Ýaryşyň final oýny 2025-nji ýylyň 31-nji maýyna meýilleşdirilýär.
Çempionlar ligasynyň häzirki ýeňijisi “Realdyr”, ol geçen ýaryşyň finalynda Dortmundyň “Borussiýasyny” utdy.
