Blue Origin ýanwar aýynda birinji basgançagynyň gonuşy bilen bagly şowsuzlykdan soň, New Glenn raketasyny ikinji gezek uçurmaga taýýarlyk görýär. Kompaniýa näsazlygy düzetdi we ýazyň ahyrynda gaýtadan uçurmagy göz öňünde tutýar diýip, baş direktor Deýw Limp täjirçilik kosmos konferensiýasynda aýtdy. Bu barada Spacenews ýazýar.
Limpiň sözlerine görä, 16-njy ýanwarda New Glenn-iň ilkinji uçuşynda birinji basgançagynyň ýitmegi hereketlendirijiniň ulgamyndaky näsazlyk sebäpli ýüze çykdy.
"Hereketlendirijidäki şertlerimiz dogrydy, ýöne baklardan hereketlendirijä barýan ähli gerekli zatlary üpjün edip bilmedik" - diýip, ol kompaniýanyň meseläniň nämededigine indi düşünýändigini aýtdy.
Limp BE-4-iň hereketlendirijilerini uçuşdaka gaýtadan işletmegi öňünden synag edip bolmaýandygyny düşündirdi.
Ikinji uçuryş üçin peýdaly ýüküň nämeler boljakdygyny entek yglan edilmedi. Limpiň sözlerine görä, täjirçilik ýükleri we synag modeli ýaly dürli wariantlar göz öňünde tutulýar. New Glenn-iň başdaky üç uçuşy synag uçuşlary bolar.
Şeýle hem, Limp şu ýyl Blue Moon Mark 1 Aý modulyny ibermek baradaky meýilnamany tassyklady.
Limp: "Şu ýyl Aýa baryp biljekdigimize öňkim ýaly ynanýaryn" - diýdi. Onuň sözlerine görä, apparat Aýyň üstüne üç tonna çenli ýüki eltip biler. Ol Ýeriň hemrasyna gonjak iň uly kosmiki gämi bolar.
Kompaniýanyň baş direktory Aý üçin işlenip düzülýän tehnologiýalaryň geljekdäki Mars missiýalarynda hem ulanylyp bilinjekdigini aýtdy. Ol hereketlendirijileriň üstünde işlenelişini, kosmosda ýangyç guýmaklygy we Blue Moon-y Aýyň orbitasyna eltmek üçin tirkegiň işlenip taýýarlanyşyny göz öňünde tutýar. Limp bu tehnologiýalary gaýtadan gurnap boljak LEGO kubjagazlary bilen deňeşdirdi.
Blue Origin geçen ýyl Mars Sample Return (MSR) maksatnamasyna täze çemeleşmeleriň konsepsiýa gözleglerini geçirmek üçin NASA tarapyndan saýlanan kompaniýalaryň arasynda bolupdy.
