YouTube dizaýnyndaky gyzyl reňki üýtgetdi. Munuň sebäbi 2017-nji ýyldan bäri ulanylýan öňki reňk bilen baglanyşykly birnäçe meseleler boldy – ol has ýiti bolup, telewizorlaryň ekranlaryny zaýalaýardy. Täze dizaýny YouTube wekilleri resmi taýdan tassyklady.
Wideohosting dizaýny geçen ýylyň ahyrynda täzeledi, ýöne munuň sebäpleri diňe häzir belli boldy. Wizual dizaýn bölüminiň ýolbaşçysy Robin Li öňki gyzyl reňkiň tehniki kemçilikleriniň bolandygyny aýtdy: ol has ýiti bolup, käbir ekranlarda mämişi görünýärdi. Mundan başga-da, ol telewizor ekranlarynyň “ýanmagyna” getirýärdi.
“Biz rewolýusiýa däl-de, ewolýusiýa isledik. YouTube-yň firma gyzyl reňki aýawly çemeleşmäni talap edýärdi” – diýip, Robin Li belledi.
Şunuň bilen baglylykda, dizaýnerler has sowuk gyzyl öwüşginini ulanmak kararyna geldi. Bir tarapdan, bu brendiň tanalmagyny saklamaga mümkinçilik berdi. Beýleki tarapdan, täze reňk has döwrebap görünýär diýlip, kompaniýanyň metbugat relizinde aýdylýar.
Netijede, täze reňk bilen YouTube-yň ulanyjy interfeýsi has ýumşak we ekranlar üçin has ýeňil boldy.
Şeýle-de, dizaýnda gyrmyzy gradient peýda boldy, ol wideo progress-barynda we beýleki elementlerde görünýär. Dizaýnerler topary ikinji reňk hökmünde mämişi we sary reňkleri hem gözden geçirdi, ýöne gyrmyzy-benewşäni saýlamak kararyna geldi, çünki ol täze gyzylyň üstüni ýetirmek üçin has tebigy görünýärdi.
Işläp düzüjiler bu reňkiň ösüşi we döredijiligi alamatlandyrýandygyny belleýär.
