RM Sotheby’s-iň Maýamidäki auksionynda 1966-njy ýylda goýberilen seýrek Ford GT40 Mk II satuwa çykarylar. P / 1032 seriýa belgili bu awtoulag gurlan sekiz ulagyň biridir. Ol meşhur “LeManyň 24 sagady” we “Sebringiň 12 sagady” çydamlylyk ýaryşlarynda bäsleşdi.
Ýaryşlar üçin ýörite işlenip taýýarlanan Ford GT40-yň dörediliş taryhy “Ford Ferrarä garşy” filminde görkezildi. Hut şol sport awtoulagy Mark Donohýuwyň we Uolt Hangseniň dolandyrmagynda 1966-njy ýylyň mart aýynda “Sebringiň 12 sagady” ýaryşynda ikinji ýeri eýeläpdi. Olar diňe Ford GT40 X-1 Roadster-de ýaryşan Ken Maýlzdan we Lloýd Rubiden utulypdy.
Şol ýylyň iýun aýynda bu Ford GT40 “Le-Manyň 24 sagady” ýaryşyna gatnaşdy, ýöne ýaryşyň bäşinji sagadynda tehniki kynçylyklar bilen bagly ýaryşdan çykdy. Ekipažy Mark Donohýudan we Pol Houkinsden ybaratdy.
Ýaryşdan soň, 1968-nji ýylda awtoulag Indianapolis awtoulag muzeýine geçirildi. 2011-nji ýylda ulag doly dikeldildi we Le-Man ýaryşyna gatnaşan görnüşindäki ýagdaýyna getirildi.
Bu taryhy awtoulagyň 8-11 million dollar aralygynda satylmagyna garaşylýar.
