Porsche elektromobillere geçmek boýunça strategiýasyna gaýtadan seretmek kararyna geldi. Nemes awtoöndürijisi içinden ýandyrylýan hereketlendirijilere bolan islegiň pikir edilişinden has uzak dowam etjekdigini boýun aldy.
Geçen tomus kompaniýa 2030-njy ýyla çenli ähli satuwyň 80%-ini elektromobil etmek maksadyndan eýýäm ýüz öwrüpdi. Indi bolsa Porsche benzin hereketlendirijili we gibrid gurluşly modelleriň sanyny artdyrmak isleýär diýip, Telegraph ýazýar.
Çözgüt Beýik Britaniýada we Ýewropada zyňyndylaryň nol derejesine geçmek möhletiniň golaýlandygyna we munuň awtoöndürijileri benzin awtomobilleri az we elektromobilleri köp satmaga mejbur etjekdigine garamazdan kabul edildi. Ýagny, awtoöndürijiler 2030-njy ýyldan Beýik Britaniýada we 2035-nji ýyldan Ýewropada täze benzin we dizel awtomobillerden ýüz öwürmeli bolar.
Germaniýanyň awtoulag ägirtleri ÝB-ni çärelere gaýtadan seretmäge ýa-da sintetiki elektron ýangyç ýaly benzin alternatiwalaryna rugsat bermäge çagyrdy.
Porsche islegiň pesligi sebäpli elektromobil önümçiligi boýunça meýilnamalaryny gowşadan soňky awtoöndürijileriň biri boldy.
Häzir Porsche benzin hereketlendirijileri käbir elektromobil konseptlerine oturtmak mümkinçiligine seredýär. Kompaniýa 2025-nji ýylda girdejisiniň 39 – 40 mlrd ýewro bolmagyna garaşýar.
Rho Motion analitikleriniň maglumatlaryna görä, 2024-nji ýylda Ýewropada satylan elektromobilleriň sany 3% azaldy. Germaniýada elektromobiller üçin salgyt ýeňillikleriniň ýatyrylmagy hem islegiň ep-esli pese gaçmagyna getirdi.
