Meşhur “Formula-1: Ýaşamak üçin sürmek” (Формулы-1: Гонять, чтобы выжить) dokumental serialynyň ýedinji möwsümi tomaşaçylara 7-nji martda elýeterli bolar. Bu barada “patyşalyk ýaryşlarynyň” metbugat gullugy habar berýär.
Bu serial janköýerlere diňe bir möwsümiň birinji ýaryşyndan soňkusyna çenli titul ugrundaky göreşi yzarlamaga däl, eýsem öz halaýan türgenleriniň şahsy durmuşy bilen tanyşmaga mümkinçilik berýär. Şeýle-de, olar “Formula-1-i” asyl bolşy ýaly tanatmak üçin zähmet çekýän toparlaryň we adamlaryň içinde bolup geçýän zatlary görüp bilýär.
Taslama 2019-njy ýylda başlady we tomaşaçylaryň ýokary bahasyna eýe boldy. Her möwsüm 10 bölümden ybarat bolup, olar çempionatyň wakalaryny jikme-jik beýan edýär.
Serialyň öňki, altynjy möwsümi 2024-nji ýylyň 23-nji fewralynda çykdy. Täze möwsüm ozaldan gelýän däbi dowam etdirip, tomaşaçylara “Formula-1-iň” gatnaşyjylarynyň we toparlarynyň perde aňyrsyndaky durmuşyny görkezer.
