Biolog-gözlegçiler ilkinji gezek Atlantik ummanynyň Tenerife adasynyň kenaryndan iki kilometr uzaklykda, suwuň ýüzüne ýakyn ýerde uly ýaşly Jonsonyň melanosetini (latynça Melanocetus johnsonii) ýazga aldylar. Bu ýazgylar «Condrik Tenerife» ekologiýa guramasynyň Instagram sahypasynda paýlaşyldy.
Bu seýrek hadysa deňiz biologlary Laýýa Walor, Mark Martin we Antonio Sabuko hem-de deňziň ýabany tebigatynyň suratçysy Dewid Haroý dagylar gabat geldiler. Olar häzirki wagta çenli melanosetleriň diňe liçinkalaryny ýa-da ölenlerini suwuň ýüzüne ýakyn ýerde görendiklerini aýtdylar.
«Onuň suwuň ýüzüne şeýle ýakyn gelmeginiň sebäbi düşnüksiz. Munuň kesel, howanyň ýokaryk urmagy ýa-da awçylardan gaçmak bilen baglanyşykly bolmagy mümkin» diýip, alymlar pikir edýärler.
Ahyrynda balyk öldi. Biologlar ony Santa-Krus-de-Tenerifedäki Tebigat we arheologiýa muzeýine tabşyrdylar.
Gorkunç görnüşleri sebäpli «deňiz şeýtany» diýip atlandyrylýan melanosetler adatça 200-2000 metre çenli çuňlukda ýaşaýarlar. Bu awçy balyk başyndaky illisiýanyň ujunda ýerleşýän we bakteriýalar arkaly ýagtylyk saçýan fotoforlary duzak hökmünde ulanýar. Ol şol duzagy arkaly özünden kiçi, kämahal bolsa has uly balyklary özüne çekýär we ýuwudýar.
