UEFA Çempionlar ligasynyň pleý-off oýunlarynda goşmaça wagtyň ýatyrylmagyny ara alyp maslahatlaşýar.
The Guardian gazetiniň habar bermegine görä, esasy wagtdan soň (iki duşuşygyň jemi boýunça deňme-deň bolan halatynda) göni 11 metrlik jerime urgusyna geçmek meselesine seredilýär. Şeýle-de bolsa, 2027-nji ýyla çenli dowam etjek häzirki teleýaýlym sikliniň ortasynda üýtgeşme boljagy gaty gümana.
Futbolçylaryň käbir kärdeşler arkalaşyklary onsuzam ýüki ýetik senenama düşýän agramy ýeňilleşdirjekdigini öňe sürüp, goşmaça wagtyň ýatyrylmagy üçin köp tagalla edýärler. Pleý-off-yň jogap oýunlarynda goşmaça 30 minudy aýyrmak ýükli senenama bilen baglanyşykly käbir kynçylyklary ýeňilleşdirip biler.
UEFA bu mesele barada düşündiriş berip, häzirki wagtda çekişmeleriň resmi däldigini we entek resmi teklipleriň ýokdugyny aýtdy. Islendik üýtgeşme UEFA-nyň ýerine ýetiriji komiteti tarapyndan tassyklanmalydyr.
Iň soňky gezek Ýewropa kubogynyň düzgünlerine uly üýtgeşmeler 2021-nji ýylda, myhmançylykdaky gol ulgamy ýatyrylanda girizilipdi.
