1915-nji ýylda öndürilen «Cyclone» kysymly motosikl Las-Wegasdaky «Mecum» auksionyna çykdy. Bu gymmatbahaly motosikli 1,32 million dollara satyn aldylar. Autoevolution neşiriniň berýän maglumatlaryna görä, bu motosikl açyk auksionda eýesini çalşan iň gymmat motosikl boldy.
Motosikliň beýle ýokary bahadan satylmagynyň esasy sebäbi – onuň örän seýrek duş gelýän model bolmagy we markanyň uly abraýa eýe bolmagydyr.
«Cyclone» – 1912-nji ýyldan 1917-nji ýyla çenli, ýagny bary-ýogy bäş ýyl hereket eden amerikan motosikl brendidir. Bu motosiklleri «Joerns Motor» kompaniýasy öndürýärdi. Ýöne bu kompaniýa bäsdeşlerine ýeňildi, sebäbi olar has amatly bahaly modelleri hödürleýärdiler. 1917-nji ýylda «Cyclone» taslamasyny şol döwürde meşhur bolan «Excelsior Motor» kompaniýasy satyn aldy.
Şeýle-de bolsa, gysga wagtyň dowamynda «Cyclone» motosiklleri tizligi we durnuklylygy bilen tanalyp, XX asyryň başlarynda meşhur bolan ýaryşlar üçin giňden ulanyldy. Motosikliň ýokary tizligi esasan hem onuň innowasion V-Twin görnüşli hereketlendirijisi bilen baglanşyklydy. 1,0 litrlik hereketlendiriji 1910-njy ýyllar üçin örän täsin görkeziji bolan 45 at güýjüni öndürýärdi. Netijede, motosikl 160 km/s-den ýokary tizlige ýetip bilýärdi. «Cyclone» 1914-nji ýylda ABŞ-da rekord goýdy – motosikl bir mil (1,6 km) aralygy bary-ýogy 35 sekuntda geçdi.
Çeşmeler dürli sanlary berýärler, ýöne umuman alanyňda takmynan 300 sany öndürilen «Cyclone» motosikllerinden diňe 6-14 sanysy häzirki güne çenli saklanyp galypdyr. Rekord baha satylan motosikl, ABŞ-da köne motosiklleriň taryhy boýunça ýöriteleşen belli tehnik Stiwen Raýt tarapyndan doly dikeldilipdir.
