Ford kompaniýasy «Raptor» subbrendiniň adyndan ýolsuz ýerler üçin niýetlenen täze «aýratyn» super off-road awtoulagy döretmegi meýilleşdirýär. Kompaniýanyň baş müdiri Jim Farli täze modeli bar bolan pikaplaryň ýa-da beýleki off-road awtoulaglaryň ýöriteleşdirilen görnüşi hökmünde däl-de, düýbünden başgaça edip döretmegi meýilleşdirýändiklerini aýtdy diýip, Top Gear neşiri habar berýär.
Jim Farliniň pikirine görä, «Raptor» seriýasyna degişli awtoulaglaryň meşhurlygynyň artmagy bilen, ýolsuz ýerlerde ýokary tizlikde sürmäge niýetlenen aýratyn modeli döretmek baradaky pikiriň döremegi logiki netijedir. Häzirki wagtda Ford kompaniýasy bu subbrendiň adyndan F-150 we Ranger pikaplarynyň, şeýle-de Bronco off-road awtoulagynyň ekstremal görnüşlerini öndürýär.
«Aýratyn» super off-road awtoulagyň döredilmegi, Ford kompaniýasynyň awtosport bilen baglanyşyklarynyň has-da berkidilmegine mümkinçilik berer.
«Ford Performance» bölüminiň ýolbaşçysy Mark Raşbruk, «Raptor» subbrendiniň uly ösüş mümkinçilikleriniň bardygyny belledi. Munuň subutnamasy hökmünde, Ford kompaniýasynyň Dakar ralli-reýdi üçin ýörite döreden Raptor T1+ modelini görkezmek bolar.
Ford Raptor T1+ awtoulagynyň uzynlygy 4574 millimetr bolup, onuň teker bazasynyň aralygy üç metrdir. Awtoulag polat skelet (prostransion) gurluşa esaslanýar, onuň korpus panelleri uglerod (karbon) materialdan ýasalan we asma ulgamy bolsa goşa keseligine berkidilen golçalar bilen enjamlaşdyrylandyr. Şeýle-de ulag 5 litrlik V8 hereketlendiriji, sekwensial karobka we doly hereketlendirijili ulgam bilen enjamlaşdyrylandyr.
