Üç eplenýän Huawei Mate XT tiz wagtdan halkara bazarlarda elýeterli bolar. Öň diňe Hytaýda satylan bu enjamyň, BAE-de alnan sertifikasiýanyň netijesinde beýleki ýurtlarda hem çykaryljakdygy tassyklanyldy diýip, Gizmochina habar berýär.
Bu smartfon TDRA-nyň maglumatlar binýadynda GRL-LX9 model belgisi bilen hasaba alyndy, bu bolsa ony halkara bazarlara çykarmak boýunça taýýarlyklaryň görülýändigini görkezýär. Myş-myşlara görä, täze modeliň 2025-nji ýylyň birinji çärýeginde satuwa çykarylmagy ähtimal.
Huawei Mate XT eplenen wagty 6,4 dýuýmlyk ekrana eýe bolup, doly açylanda bolsa 10,2 dýuýma çenli giňelýär. Ol 120 Gz täzeleniş ýygylygy bolan OLED LTPO displeýi bilen enjamlaşdyrylandyr. Telefonyň 5600 mAh göwrümli batareýasy 66 Wt kuwwatly çalt zarýad alşy goldaýar.
Bu enjam Kirin 9010 prosessorynda işleýär we 16 GB operatiw ýat (RAM) hem-de 1 TB ýat bilen hödürlenýär. Esasy kamerasy bolsa 50 megapiksel çözgütde surata düşürýär.
