Amerikan internet üpjünçisi Comcast kompaniýasy L4S (Low Latency, Low Loss, Scalable Throughput) atly täze tehnologiýasyny köpçülige mälim etdi. Bu tehnologiýa internet aragatnaşygynyň gijikdirme derejesini ep-esli azaldýar diýip, The Verge neşiri habar berýär.
Täze internet ulgamyny ilkinji bolup Comcast-yň Xfinity abunalary ulanyp başlar. Kompaniýa bu tehnologiýanyň ýaýbaňlandyrylmagy üçin Nvidia, Meta we Valve ýaly iri amerikan kompaniýalary bilen bilelikde iş alyp barýar.
L4S standarty, beýleki esasy internet protokollary ýaly, Internet inženerçilik geňeşi (IETF) tarapyndan resmi taýdan tassyklandy.
L4S tehnologiýasynyň esasy tapawudy – bölekleýin gelýän maglumatlara (paketlere) ýörite bellikleriň edilmegidir. Bu ýagdaý, marşrutizatora (routere) gelýän maglumatlaryň haçan ýüklenýändigini tiz anyklamaga ýardam berýär. Netijede, internediň hereketi häzirkiwagt režiminde sazlanýar we tor has durnukly işleýär.
Adaty ulgamlarda maglumat akymy dolandyrylanda, käbir paketler ret edilýär, soň bolsa başga çäreler görülýär. Bu ýagdaý internediň gijikmegine we maglumat ýitgisine sebäp bolýar. Şeýle meseleler wideoaragatnaşykda we onlaýn oýunlarda uly kynçylyk döredýär. L4S muny düzetmek üçin paketleriň ugruny tiz we awtomatiki sazlaýar. Comcast-yň aýtmagyna görä, täze ulgam gijikdirme derejesini 78% azaldýar.
Täze tehnologiýany diňe internet üpjünçisi ornaşdyrsa, ol doly peýdaly bolmaz. Şonuň üçin Comcast-yň hyzmatdaşlary bu täze protokoly goldajakdygyny mälim etdiler. Nvidia GeForce NOW bulut oýun hyzmaty, Apple FaceTime we Vision Pro enjamy, Meta-nyň garyşyk hakykat garnituralary hem-de Valve Steam platformasyndaky köp sanly oýunlar ýakyn wagtda bu ulgama laýyk getiriler.
