Beýik Britaniýanyň Vodafone mobil operatory bilen AST SpaceMobile atly emeli hemra hyzmat üpjünçisi, üýtgedilmedik iki adaty smartfon ulanyp, emeli hemra arkaly wideo jaň etmegi başaryp synaglary üstünlikli geçirdiler diýip, The Verge neşiri habar berýär.
Bu wideo jaňy Vodafone Group-yň baş müdiri bilen aragatnaşyk desgasynyň hyzmat edýän çäginden daşdaky Vodafone kompaniýasynyň işgäriniň arasynda bolup geçdi. Jaň ýakynda orbita çykarylan, her biri 1500 kg agramly bäş sany BlueBird AST emeli hemrasy arkaly geçirildi.
Neşiriň berýän maglumatlaryna görä, wideo jaň birneme düşnüksiz boldy, ýöne hemralar maglumatlary hakykatdan hem häzirkiwagtda geçirmegi başardylar. Vodafone we AST synagyň tehniki jikme-jiklikleri, mysal üçin, internediň takyk tizligi barada anyk maglumat bermediler.
Şeýle-de bolsa, geçirilen synag BlueBird emeli hemralarynyň wideo jaňlaryny alyp barmaga mümkinçiliginiň bardygyny görkezdi.
AST häzirki wagtda esasy bäsdeşi bolan SpaceX Starlink-den birneme yza gelýär. Starlink eýýäm göni adaty smartfonlara birikmek üçin niýetlenen «Direct-to-Cell» (Göni öýjüge) tehnologiýasy bilen 400 töweregi emeli hemrany orbita çykaryp, giň gerimli synaglara başlady. AST ulanyjylara doly aragatnaşyk hyzmatyny hödürläp bilmek üçin häzir ýene-de onlarça emeli hemrany uçurmaly.
Häzirki wagtda AST-niň ABŞ-da AT&T we Verizon bilen bilelikde hemra aragatnaşygynyň beta-synagyna haçan başlajakdygy belli däl. Kompaniýanyň aýtmagyna görä, BlueBird emeli hemralary sekuntda 120 Mbit-e çenli maglumat geçirip bilýär.
