Huawei kompaniýasynyň täze patentleriniň birinde akylly sagatlara 3D barmak yzy skanerini ornaşdyrmak barada täsin pikir ýüze çykaryldy. Bu tehnologiýa şahsy maglumatlara rugsatsyz girişiň öňüni almak boýunça goşmaça gorag hödürleýär diýip, Gizmochina habar berýär.
Şeýle-de has täsin zat – bu sensoryň ulanylyşy bilen ýüze çykýan täze dolandyryş usulydyr.
Skaneriň işleýşi smartfonlardaky gurluşa meňzäp biler. Barmak yzyny skanirlemek üçin ulanyjy barmagyny sagadyň ekranyndaky aýratyn ýere goýup, ony 360 gradus öwürmeli bolar. Mundan başga-da patentde bu sensoryň barmagyň hereketlerine hem reaksiýa bildirip biljekdigi aýdylýar. Munuň esasynda enjam bilen täsirleşmegiň we ony ulanmagyň dürli görnüşleri hödürlener.
Şeýle-de, birnäçe barmagy hasaba almak mümkinçiligi göz öňünde tutulýar. Şeýlelikde, her barmaga belli bir wezipäni ýerine ýetirmek tabşyrylyp bilner. Mysal üçin, her barmak belli bir programmany ýa-da funksiýany işledip biler.
Häzirki wagtda bu diňe patent derejesinde bolup, Huawei-niň bu tehnologiýany hakyky enjamlarynda ulanjakdygy barada maglumat ýok.
