Ýapon awtoöndürijisi Mazda öz logotipini täzeledi. Nyşanyň täze dizaýny öňküsinden has tekiz we ýönekeý boldy diýip, Nikkei habar berýär.
Çarlagy ýada salýan öňki nyşan 1997-nji ýylda hödürlenipdi. Kompaniýa soňky 28 ýylda ilkinji gezek oňa üýtgeşme girizmek kararyna geldi. Umuman, täzelenen logotip ulanylyşyna baglylykda häzirki bilen ugurdaş hem ulanylyp bilner.
Täze minimalistik dizaýn ilkinji gezek 2024-nji ýylyň iýulynda internet torunda peýda boldy, şol wagt Mazda ony Ýaponiýanyň Patent edarasynda haryt nyşany hökmünde hasaba aldyrdy.
Belläp geçsek, logotip baradaky habar kompaniýanyň 150 ýyllygynyň öňüsyrasynda peýda boldy. Kompaniýa 1920-nji ýylyň 30-njy ýanwarynda esaslandyryldy, ýöne ilkinji awtomobilini (üç tekerli ýük ulagy) 1931-nji ýylda çykardy. Ilkinji ýeňil awtomobil, Mazda R360 Coupe, has giç – 1960-njy ýylda peýda boldy.
Ilkibaşda awtoöndüriji logotipde Mazda ýazgysynyň dürli gaýtalanmasyny ulandy. Ýönekeýleşdirilen şrift 1975-nji ýylda ilkinji gezek görkezildi. Soňra çarlagyň ganaty görnüşindäki nyşan peýda bolmazdan ozal 1991-nji ýylda romb şekilli logotip hödürlendi.
Soňky ýyllarda nyşanyň minimalistik bolmagy VW, Audi, Mini, BMW, Volvo, Lotus, Citroen, Renault, Nissan, Ford, Buick, Lancia, Lamborghini, Aston Martin, Geely we Jaguar ýaly köp awtoöndürijiler üçin trende öwrüldi.
