Russiýanyň “Rostow” futbol kluby Türkmenistanyň milli ýaşlar ýygyndysynyň 18 ýaşly hüjümçisi Denis Titow bilen şertnama baglaşdy. Futbolçy eýýäm BAE-de geçirilýän okuw-türgenleşik ýygnanyşyklarynda esasy topara goşuldy diýip, toparyň metbugat gullugy habar berýär.
Şertnamanyň möhleti aýdylmaýar.
“Denis Titow – “Rostow” FK-nyň oýunçysy! 18 ýaşly hüjümçi biziň klubumyz bilen şertnama baglaşdy. Denis – Aşgabadyň çagalar-ýetginjekler Olimpiýa ätiýaçlyk sport mekdebiniň ýetişdiren oýunçysy. Ol Türkmenistanyň ýetginjekler we ýaşlar ýygyndylarynda çykyş etdi. Häzirki wagtda oýunçy “Rostowyň” esasy topary bilen bilelikde BAE-de okuw-türgenleşik ýygnanyşyklaryna gatnaşýar. Denisi garşylaýarys we klubumyzyň düzüminde üstünlikleri arzuw edýäris” – diýlip, “Rostowyň” metbugat gullugynyň habarynda aýdylýar.
Denis – merkezde ýa-da gapdalda hereket edip, hüjümçi ýarymgoragçy we hüjümçi hökmünde oýnamaga ukyply bolan köptaraply oýunçy, ýöne onuň esasy roly – çep winger. Ol geçen ýylyň noýabr aýynda 18 ýaşyny doldurdy. Ol “Altyn Asyryň” hüjümçisi Mihail Titowyň körpe doganydyr.
Türkmenistanyň U17 milli ýygyndysy üçin Denis Titow üç oýna gatnaşyp, bir gol geçirdi.
Häzirki möwsümde “Rostow” Russiýanyň Premýer-ligasynyň 18 tapgyrynyň jemi boýunça 26 utuk bilen ýedinji orny eýeleýär.
