Saud Arabystanynyň "Al-Hilýal" toparynyň hüjümçisi Neýmar karýerasyny Braziliýanyň “Santosynda” dowam etdirer. Bu barada abraýly insaýder Fabrisio Romano habar berdi. Žurnalistiň sözlerine görä, taraplar eýýäm dilden ylalaşyk gazandylar.
Şu hepde geleşigiň gutarnykly resmileşdirilmegine garaşylýar.
Owal Footmercato neşiri Neýmaryň “Santosa” geçmegiň hatyrasyna aýlyk hakynyň düýpli azaldylmagyna taýýardygyny habar beripdi. Braziliýaly futbolçy Saud Arabystanynyň kluby bilen şertnamasynyň möhletiniň gutarmagyna entek alty aý töweregi wagtyň bardygyna garamazdan, şu aýda dogduk klubuna gaýdyp barmak isleýär.
Braziliýaly oýunçy Neýmaryň häzirki wagtda şertnama baglaşan “Al-Hilýalynda” geçen ýyl 101 million ýewro gazanandygyny ýatladýarys. Şeýle-de bolsa, şikesler sebäpli futbolçy meýdançada bary-ýogy üç gezek çykyş edip, jemi 42 minut oýnady. Emma bu klubuň üstünlik gazanmagyna päsgel bermedi. Geçen möwsümde “Al-Hilýal” 31 ýeňiş gazandy we bir gezek hem utulman, üç gezek deňme-deň boldy. Topar çempionlygy gazandy we täze möwsümde ýene-de birinji orny eýeledi we ýurduň Super kubogyny aldy.
Neymar “Santosda” tälim alyp ýetişen futbolçy. Ol bu klubda 2009- 2013-nji ýyllara çenli, “Barselona” geçýänçä oýnady.
Futbolçy fewral aýynda 33 ýaşyny doldurar.
