Google sanly hasaplary telefonyň ogurlanmagyndan goramak maksady bilen, Android 15 ulanyjylary üçin täze howpsuzlyk funksiýasyny işe girizýär. «Identity Check» (Şahsyýet Barlagy) diýlip atlandyrylýan bu funksiýa, ulanyjynyň ygtybarly ýerde bolmadyk wagtynda, meselem, öýde ýa-da iş ýerinde däl mahaly, hasap we enjam sazlamalaryna girmek üçin biometriki taýdan tassyklanmagy talap edýär diýip, The Verge neşiri habar berýär.
Identity Check enjamyň PIN koduny üýtgetmek, ogrulyga garşy goragy öçürmek, Find My Device (Enjamymy Tap) funksiýasyny öçürmek, enjamy başky sazlamalaryna gaýtarmak we biometriki maglumatlary üýtgetmek ýaly möhüm sazlamalary goraýar.
Google täze funksiýanyň işe girizilmegi bilen bagly blog ýazgysynda: «Ogurlanan enjam, başgalaryň eline düşen ýagdaýynda, gizlin maglumatlaryňyzy paş etmek, şahsyýetiňizi ogurlamak, maliýe galplyklary we gizlinligi bozmak ýaly howplara sezewar edip biler» diýip, bu funksiýanyň näderejede möhümdigini düşündürýär.
Bu funksiýa geçen ýylyň dekabr aýynda Pixel Drop täzelenmesiniň bir bölegi hökmünde synag görnüşinde peýda bolupdy. Funksiýa, öňümizdäki hepdelerde Galaxy AI aýratynlyklary bilen gelýän One UI 7 täzelenmesini aljak Samsung Galaxy enjamlarynda elýeterli bolar. Şeýle hem, şu ýylyň ahyrynda bolsa beýleki öndürijileriň enjamlarynda elýeterli bolar.
Mundan öň, Apple hem «Stolen Device Protection» (Ogurlanan Enjam Goragy) atly şuňa meňzeş funksiýany hödürläpdi. Bu funksiýa, iPhone ulanyjylary parollaryny girizip durkalar olary synlap, enjamy ogurlandan soň şol paroly ulanyp, şahsy maglumatlara girmäge ýa-da eýesini hasapdan blokirlemäge synanyşýan jenaýatçylaryň öňüni almak üçin niýetlenýär.
