Hindistanda geçirilen “Global Mobility Expo 2025” sergisinde çöl we dag şertlerinde syýahat etmek üçin niýetlenen, bäş gapyly Suzuki Jimny Conqueror tanyşdyryldy. Model “täze dizaýny görkezmek” we “müşderileriň pikirini ýygnamak” maksady bilen görkezildi. Tehniki aýratynlyklarda ýa-da şassi ulgamynda hiç hili üýtgeşme girizilmedi. Täzelikler, esasan, goşmaça enjamlar we daşky görnüş bilen baglanyşykly boldy diýip, ithome portaly habar berýär.
Awtomobil adaty wnedorožnik stili bilen has güýçli bezelen, goşmaça off-road aksessuarlar bilen enjamlaşdyrylan. Ulagyň kuzowy meleden gara reňke geçýän ýalpyldamaýan gradient görnüşinde boýalan we gapdalynda Jimny 4x4 ýazgysy bar.
Ulagyň öň tarapy täze radiator gözenegi we kuzow reňkine gabat gelýän gaplama elementler bilen bezelen. 16 dýuým ululykdaky ýeňil alýumin tekerler ýörite wnedorožnik şinalary bilen sazlaşýar. Mundan başga-da, ulag lebýodka, suwly ýerlerden geçmek üçin kömekçi şnorkel, arka merdiwan, palta, üçekde ýük ýeri, gar zynjyrlary we goşmaça ýag-ýangyç gaplary ýaly gurallar we enjamlar bilen enjamlaşdyrylan.
Jimny, 1,5 litrlik K15B atmosferaly hereketlendiriji bilen üpjün edilýär, onuň iň ýokary kuwwaty 105 at güýjüne we iň ýokary momenti 134 Nm barabardyr. Ulag islege görä, 5 basgançakly mehaniki ýa-da 4 basgançakly awtomatik karobka bilen enjamlaşdyrylyp bilner. Ulag ýerden 210 mm beýiklikde bolup, 36 gradus ýakynlaşma (въезда) we 50 gradus uzaklaşma (съезда) burçuna eýe.
