SoCal gaznasy Golliwudyň ýyldyzlary bilen duşuşmak mümkinçiligini hödürleýän haýyr-sahawat gaznasyny işe girizdi. Alnan serişdeler Kaliforniýadaky ýangynlardan ejir çekenlere kömek üçin iberiler diýip, The Hollywood Reporter habar berýär.
Gaznanyň teklipleriniň arasynda şular bar: Juliýa Roberts bilen günortanlyk nahary, Brodweýiň “Gijäňiz rahat bolsun we şowlulyk” premýerasy we Jorj Kluni bilen duşuşyk üçin petekler, “Bir binadaky ölüm” (Убийство в одном здании) serialynyň surata düşürilen meýdançasyna baryp görmek, “Ýura eýýamynyň dünýäsiniň dikelmegi” (Возрождение мира юрского периода) filminiň premýerasynda Skarlett Ýohansson bilen gürrüňdeşlik, Larri Dewid we Dok Riwers bilen golf oýnamak, aktýorlar düzümi bilen “Ak lotosyň” premýerasyna petekler.
Haýyr-sahawat çäresine gatnaşan her bir adam bagyş edýän mukdaryna garamazdan ýyldyzlar bilen duşuşygy ýa-da premýera üçin petek gazanyp biler.
Aýdym-saz jemgyýeti hem haýyr-sahawat aksiýalaryna işjeň gatnaşmagy dowam etdirýär.
30-njy ýanwarda Kaliforniýanyň Inglwud şäherindäki Intuit Dome we Kia Forum meýdançalarynda FireAid haýyr-sahawat konserti geçiriler. Oňa Billi Aýliş, Ledi Gaga, Red Hot Chili Peppers, Earth, Wind & Fire, Green Day, Keti Peri, Jelly Roll, Joni Mitçell, Lil Baby, P!nk we beýleki ýyldyzlar gatnaşar.
Konsert AMC Theatres kinoteatrlarynda, şeýle-de Apple Music, Apple TV, Max, Netflix Tudum, Paramount+, Prime Video, Spotify, SoundCloud, YouTube ýaly platformalarda görkeziler. Tomaşaçylar tomaşa wagty haýyr-yhsan edip biler. Çäre üçin petek satuwy 22-nji ýanwarda başlaýar.
Petek satuwyndan we onlaýn ýaýlymlardan alnan serişdeler hem ejir çeken maşgalalara goldaw bermäge, infrastrukturany dikeltmäge hem-de ýangynlaryň öňüni almak boýunça çärelere gönükdiriler.
Şeýle-de, kanadaly aýdymçy The Weeknd-iň Los-Anjelesiň ýaşaýjylaryna we ýangyn söndürijilere kömek üçin 1 mln dollar bagyş edendigi habar berilýär. Aýdymçy bu serişdeleri birnäçe ýöriteleşdirilen gaznalara iberer diýip, Variety ýazýar.
