Köpugurly ýumuş (multitasking) funksiýasy Android operasion ulgamynda (OS) uzak wagtdan bäri bar bolsa-da, bu ugurda täzelikler köpden bäri görünmeýärdi. Häzirki wagtda Android OS-da işleýän smartfonlar we planşetler şol bir wagtda diňe iki programmany işledip bilýär. Goşmaça mümkinçilikler bolsa interfeýs örtükleri (OxygenOS we ş.m.) arkaly hödürlenýär. Emma bu ýagdaý Android 16-da üýtgäp biler diýip, Android Authority neşiri habar berýär.
Bir ekranda iki programmany işletmek dürli ululykdaky enjamlarda elýeter we amatlydyr. Uly ekranly enjamlar bolsa, şol bir wagtyň özünde üç programmany işletmäge amatly şert döredýär. Mysal üçin, Samsung-yň One UI interfeýsinde, Lenovo enjamlarynda “Kompýuter režimi” (PC Mode) bilen açylan penjirelerde ýa-da OnePlus enjamlaryndaky “Open Canvas” funksiýasy arkaly bu mümkinçilik hödürlenýär. Android Authority neşiriniň žurnalistleri, Google-yň bu mümkinçiligi deslapky aýratynlyk hökmünde Android 16-a dahyl etjekdigini ýüze çykardylar.
Android 16-nyň synag wersiýasynyň ikinji tapgyrynda köpugurly ýumuş funksiýasy arkaly, şol bir wagtda üç programmany işletmek mümkinçiliginiň üstünde işlenilýär. Bu funksiýa häzirlikçe Google tarapyndan resmi taýdan tassyklanmady, şeýle-de bolsa, görkezilen nusga wideolara laýyklykda, funksiýanyň planşetlerdäki “arassa” Android ulgamynda we beýleki OS wersiýalaryna garanyňda has amatly boljakdygy barada aýdylýar.
