Los-Anjelesde dowam edýän tokaý ýangynlary sebäpli, 200 müň adam öýlerini ýitirip, mejbury göçürildi. Bu pajygaly ýagdaýda meşhur aktýorlar, aýdymçylar we kompaniýalar ejir çekenlere goldaw bermek üçin uly möçberde maliýe kömegini we beýleki zerur serişdeleri berýärler diýip, Forbes neşiri habar berýär.
Leonardo Di Kaprio weýrançylykly tokaý ýangynlary bilen baglanyşykly zyýany azaltmak we kömek bermek maksady bilen 1 million dollar kömek berdi. Şeýle-de, meşhur “Metallica” metal-grupbasy 500 müň dollary, aýdymçy Jennifer Lopez bolsa özüniň şahsy eşiklerini, aýakgaplaryny we gözellik serişdelerini ejir çekenlere gowşurdy.
Mundan başga-da, iri amerikan kompaniýalary hem goldaw çärelerine işjeň gatnaşdylar. Google we YouTube bilelikde 15 million dollar, Amazon 10 million dollar, Netflix 10 million dollar, Meta (Mark Zukerberg we Prisçilla Çan) 4 million dollar, Paramount 1 million dollar, Comcast NBCUniversal 10 million dollar, Walmart 2,5 million dollar, Target 1 million dollar we Kroger 1 million dollar bagyş edip, ýangynlardan ejir çekenlere goldaw berdiler.
