Kanadanyň Marşfild şäherinden Jo Welaýdum öýüniň kamerasy bilen ýere gaçan meteoridi ýazga aldy. Meteorit, onuň öýüniň öňündäki ýola (garažyň girelgesine) gaçdy diýip, CBC habar berýär.
Kosmosdan gelen bu jisim soňra “Şarlottaun meteoridi” diýlip atlandyryldy. Ol, takmynan, sagatda 200 kilometr tizlik bilen ýere gaçdy. Jo Welaýdum hadysadan birnäçe minut öň şol ýerde öz itleri bilen durandygyny aýtdy.
Şeýlelikde, taryhda ilkinji gezek adaty kamera arkaly meteoridiň ýere gaçýan pursady, sesi bilen bilelikde ýazga alyndy.
“Bu öň eşiden zatlarymyza meňzänok. Ylmy taýdan bu düýbünden täze bir zat – hakykatdan hem haýran galdyryjy. Her gezek şeýle waka bolanda, kosmosdan täze bir nusga gelýär” diýip, Alberta uniwersitetiniň meteoritler ýygnanşygynyň kuratory Kris Herd aýtdy.
Onuň sözlerine görä, meteorit Mars bilen Ýupiteriň aralygyndaky asteroid guşaklygyndan gelip, uzak ýol geçipdir.
Alymlar meteoritden takmynan 95 gramlyk bölekleri topladylar. Hünärmenler şol bölekleriň ilkinji seljermesini geçirip, onuň hondritdigini – kosmiki daşlaryň iň köp duş gelýän, däne gurluşlydygyny tassykladylar.
