2024-nji ýylda Mercedes-Benz kompaniýasy esasy bazarlarda islegiň gowşamagy we elektromobil satmakdaky kynçylyklar sebäpli awtomobilleriň satuwynyň pese gaçmagyny hasaba aldy. Bu barada Reuters agentligi habar berýär.
Germaniýanyň lýuks awtoöndürijisi ýylyň tutuş awtomobil pudagy üçin, aýratynam, Hytaýda islegiň peselmegi sebäpli, agyr bolandygyny belledi. Agentligiň maglumatlaryna görä, Mercedes-Benz bir ýylda 1 983 400 awtomobil satdy, bu 2023-nji ýyl bilen deňeşdirilende 3% azdyr. Pese gaçmagyň esasy sebäpleri Hytaýda satuwyň 7% we Ýewropada 3% peselmegi boldy.
Mercedes-Benz elektromobilleriniň satuwy 23% azalyp, 185 100 birlik boldy. Bu hem kompaniýa üçin goşmaça kynçylyklary döredýär, sebäbi 2025-nji ýylda Ýewropa Bileleşiginiň kömürturşy gazynyň zyňyndylaryny azaltmak boýunça täze, has berk talaplary güýje girýär. Eger elektromobil satuwy ýokarlanmasa, Mercedes-Benz beýleki kompaniýalar bilen gymmat bahaly şertnamalary baglaşmaly ýa-da uly jerimeleri tölemeli bolar.
2024-nji ýylyň dowamynda Mercedes-Benz girdeji boýunça ýyllyk meýilnamasyny iki gezek peseltdi we çykdajylary azaltmakçydygyny aýtdy. Şeýle-de, kompaniýa girdejililik boýunça orta möhletli meýilnamalaryna täzeden garamak isleýär, sebäbi bazardaky ýagdaý ýakyn wagtda gowulaşmasa gerek.
2024-nji ýyldaky maliýe netijeleri 20-nji fewralda hödürlener.
