16-njy ýanwarda Jeff Bezosyň eýeçiligindäki Blue Origin kosmos kompaniýasy täze New Glenn raketasynyň ilkinji synag uçuşyny amala aşyrdy. Uzynlygy 98 metr bolan raketa, ýerli wagt bilen gije sagat 02:02-de (Aşgabat wagty bilen sagat 12:02-de) ABŞ-nyň Florida ştatyndaky Kanaweral burnundan üstünlikli uçuryldy diýip, BBC News habar berýär.
Synag uçuşynyň esasy maksady gazanyldy – raketa 12 minutdan soň orbita baryp ýetdi.
Emma uçuşdan 20 minut soň, Blue Origin kompaniýasy raketanyň köp gezek ulanylmaly birinji bölegini Atlantik ummanyndaky platformasyna ýuwaş gonduryp bilmändiklerini aýtdy.
Blue Origin Ilon Maskyň SpaceX kompaniýasynyň esasy bäsdeşleriniň biri bolup, ol kosmosa degişli söwda bazarynda öňdebaryjy hasaplanýar. Iki kompaniýanyň hem maksady kosmosa köp sanly emeli hemrany ibermek, hususy kosmos stansiýalaryny açmak we Aýyň üstünde yzygiderli uçuşlary amala aşyrmakdyr.
Habary eşiden badyna Ilon Mask bäsdeşine gutlag iberdi:
«Ilkinji synanyşykda orbita çykmagyňyz bilen gutlaýaryn!» diýip, milliarder X sosial torunda ýazdy.
Belläp geçsek, bu uçuş öň üç gezek yza süýşürilipdi.
