Blue Origin kompaniýasy, özüniň täze agyr ýük göteriji raketasy bolan New Glenn-iň ilkinji uçuşyny, uçurylmagyna birnäçe minut galanda ýatyrdy. Uçuşyň 13-nji ýanwarda ABŞ-nyň Kosmos güýçleriniň Kanaweral burnundaky (Cape Canaveral) stansiýasyndan amala aşyrylmagy meýilleşdirilipdi diýip, Space.com habar berýär.
Mesele raketanyň aşaky ulgamlaryndan (podsistemasalaryndan) biriniň näsazlygy bilen baglanyşykly boldy we gysga wagtda aradan aýrylyp bilinmedi.
“Biz häzirki uçuş synanyşygymyzy ýatyryp, aşaky ulgamda ýüze çykan meseläni çözmäge we uçuş penjirämizden çykmaga mümkinçilik döretmek kararyna geldik. Indiki synanyşygymyz üçin mümkinçilikler gözden geçirilýär” diýip, Blue Origin X sosial ulgamynda beýannama berdi.
Ars Technica salgylanyp, esasy sebäbiň ýelejirediş kanallarynyň buz bilen dolmagy barada habar berilýär. Ony eretmek üçin edilen synanyşyklar hem netije bermändir.
Uçuşyň esasy maksady raketanyň ikinji bölegini orbita çykarmakdy. Şeýle-de, NG-1 missiýasynyň çäklerinde raketanyň birinji böleginiň okeandaky platforma gondurylmagy meýilleşdirilipdi, ýöne bu üstünlik barada, hatda kompaniýanyň esaslandyryjysy Jeff Bezos-yň özi hem şübhe duýýardy.
Blue Origin kompaniýasy New Glenn raketasyny uçurmaga şu gün gaýtadan synanşar.
98 metr beýikligi bolan New Glenn raketasy, Blue Origin-iň esasy bäsdeşi SpaceX-iň Falcon Heavy raketasy bilen deňeşdirilýär. New Glenn, Ýeriň pes orbitasyna 45 tonna ýük göterip bilýär, Falcon Heavy bolsa 64 tonna.
New Glenn-iň birinji bölegi hem gaýtadan ulanylar ýaly dizaýn edilendir. Raketada kompaniýanyň özüniň öndüren BE-4 suwuk ýangyçly raketa hereketlendirijileri ýerleşdirilendir. Blue Origin ozal hem ULA kompaniýasynyň Vulcan raketasyny uçurmak üçin şu hereketlendirijilerden peýdalanypdy.
