Roždestwo-nyň öňüsyrasynda repçi Post Malone Tehasyň Hýuston şäherindäki The Railyard atly kiçijik bara bardy we şol gije işe çykmaly bolan barmen zenana 20 müň dollar möçberinde çaý puly berdi. Zenan sahylyk bilen berlen sowgat hakda Music Mayhem žurnalyna gürrüň berdi.
Çagasyny ýekelikde terbiýeleýän 36 ýaşly Rene Braun gijeki çalşykda işlemäge mejbur bolupdyr. Baýramçylyk gijesini 9 ýaşly gyzy Iliananyň ýanynda geçirip bilmejegine gaty gynanypdyr. Ozal ol gyzy bilen hemişe baýramçylygy bilelikde belläp, köke bişirýän we Roždestwo filmlerine tomaşa edýän ekenler, ýöne bu gezek bu däp bozulypdyr.
“Gyzymy ýeke goýup, işe gitmeli bolanyma gaty gynanypdym. "Hudaýyň maňa Täze ýylda keramat ýollajakdygyndan habarsyzdym" – diýip, ene gürrüň berdi.
Post Malone bu ýerede dostlary, şol sanda kantri-ýerine ýetirijisi Shaboozey bilen barypdyr. Braunyň sözlerine görä, sazanda “kiçigöwünli we ýakymly” adam eken, onuň peýda bolmagy märekäniň keýpini göteripdir. Sazanda bilen dostlary agşamy barda geçiripdir, terrasada tans edipdirler, saz diňläpdirler.
Baryň ýapylmaly wagty bolanda, sazanda hasabynyň beýleki müşderiler tarapyndan tölenendigine garamazdan, özüne çek ýazylmagyny talap edipdir. Birsalymdan Braun repçiniň özüne 20 000 dollar çaý puly goýup gidendigini bilipdir.
“Men aglap goýberipdirin. Bu gije juda tolgundyryjy boldy, men öýden uzakdadym ahyry, baryň tükeniksiz hysyrdysy bilen başagaýdym. Olaryň [Malone Post bilen dostlarynyň] gelip gidenini aklyma sygdyrjak bolýardym. Çaý puly bolsa üstesine boldy" – diýip zenan boýun aldy.
Barmen zenanyň sözlerine görä, bu pul onuň kärende bergisini üzer we öz işini açmak üçin pul gatanjy bolar. Braun gyzynyň ýanynda has köpräk bolar ýaly, özi üçin işlemegi arzuw edýär.
